تشوف رويلا من النظرة الأولى
تقول شيطان تتقلب غولة
بص في عينيها.. الخطر فيها.. ساعتها راح تفهم الفولة
دي شكلها يغيظ.. صوتها كالمعيز
فوق كدا طويلة.. لأ وهبيلة
العالم لذيذ لو يرتاح..
من رويلا غوريلا أم غل
بحب لما ألاقي فلوس كنت ناسياها في جيوبي.. أو شيكولاته في درج مكتبي.. أو بونبون في شنطتي.. بحب مفاجآتي المنسية إللي لما افتكرها بفرح =)
“
واحشني وقت الشروق.. وقت بداية كل يوم..
إزاي الشمس بتكسر ضلمة الليل..
وإزاي العصافير بتصحي بعضها عشان رزق يوم جديد..
بحب الشروق.. وهواه النضيف..
بحب ضحكات العيال وهم رايحين مدارسهم.. وصوت المحلات وهي بتفتح بيبانها..
بحب البدايات إللي فيها أمل.. بحب وقفتي في البلكونة وانا باتنفس بكل عمق..
ومع كل نفس.. بزداد وبهجة وفرح..
وبزداد أمل إني أعمل فيه كل حاجة حلوة وكل حاجة جميلة..
وبحس إني زي الشمس.. هقدر أكسر ضلمتي.. وأنور حياتي بنفسي..
إني أقدر أعمل كل حاجة.. حتى لو كانت مستحيل..
انا بحب الشروق..
الانتخابات 2
قرار اتخذته أنا بشأن الجمهورية الجديدة والمنتظرة:
أنا هارضى بأي رئيس أيَّـاً كان حتى لو مش طايقاه.. على شرط إنه يمشي بعد 4 سنين.. وبس
عن الإنتخابات
لو حد لقيته قدام اللجنة بيسألني هتنتخبي مين.. أو قعد ينصحني باسم الدين عشان أختار حد معين.. أو قعد يقولي ده فلول أو ده حلو.. أو ده تاريخه كذا.. أو ده ابن كذا.. وده برنامجه كذا.. أو حتى لو سألني بس كدا من باب الفضول البشري.. مش هرد.. وممكن أتعصّب عليه وأفقد شعوري.. لأني اكتفيت واستكفيت من الانتخابات إللي فاتت.. كل واحد يستفتي قلبه.. ويسأل ضميره.. ويروح ينتخب.. ويدعي ربنا انه يولي من يصلح.. أعتقد بعدها انك مش هتحس لا بالذنب أو إن صوتك راح عالفاضي.. لأن صوتك ده انت مسؤول عنه قدام ربنا.. مش قدام حد تاني.. وبس
